تصدق وإلا مـا تِصَدِّق أنا عَاجِزْ عَنْ التفكير
تعَالْ وشُوفْ في عينِي غِيابكْ وشْ عَمَلْ فيني
حبيبي ما بُقى عِندي صَبرْ يتْحَمَّـلْ التأخير
رَحَلتْ وعِقبكْ الدنيا غلاها طاح مِنْ عيني
أجَاوبْ اللِّي يسْألني عَنْ أخْبَاري وأقولْ بخير
وأنا لا خِيـر بغيابـكْ ولا حَاجَــه تهنيني
على طاريكْ كِلْ لحظه ولا أحتاج للتذكيــر
حَريصْ القلب ما ينسَى عيونِكْ, لا توصيني
مَحَدْ يِقْدَر يعَوِّضْنِي لأنِّكْ في عيُوني غيـر
ومَهْمَا شِفتْ أنا الفرحة بدونِكْ ما تسليني
وكيف الحَالْ وشلوني جَوابٍ ما يَبي تفسـير
بدونِكْ إنتْ, ما تِضْحَكْ حَياتي وترْمِشْ اسنيني
مِثلْ شَاعِرْ عِجَزْ يوصَفْ شعُوره وخانه التعبير
أنا ضايع ولا أدري مِـنْ فـراقِكْ أنا وينـي
مِثلْ طيرٍ كِسَرْ بُعْدِكْ جَناحَه وما قِدَرتْ أطير
أحَاولْ أبْتِسِمْ وأنْسَى ولكنْ وشْ ينسيني..؟!
أشُوفِكْ في صباحي أنت مَعْنَى يا صباح الخير
وأشُوفِكْ في مَسَائي حِلْم وردي لا تصحيني
تِصَدِّق السَهَر يَرْسِمْ عيُوني ويتْقِنْ التصوير
ويشِقْ النُور في صفحة حياتي وما ألاقيني
أنامْ شلونْ ومشكلتي عِجزتْ ألقى لَهَا تدبير
طِلَبتْ النُومْ لحظاته وعيَّا النُـوم يعطينـي
تغيَّر وجْهَي مِنْ أوَّل غيـابكْ وإبْتِدَى التأثير
حبيبي مِنْ التَّعَبْ كافي خذيتْ اللِّي يكفيني
يا أغلى مِنْ رَحَل عنِّي يا كِلْ الحُبْ والتقدير
تعَالْ إنْ كان لِي عِندِكْ مَعَزَّه وكان تغليني
تعَالْ إنْ كِنتْ تعشقني وإذا فِعلاً تبي لي خير
تعَالْ ومِدْ لِي كَـفْ الوَصِلْ وآمِدْ كَفينـي
إذا كانْ الجِفا واجِبْ بدى مِنْ قلبي التقصير
أبيكْ الحِينْ تِرجَعْ لِي ولا تِرجَعْ تخلينـي
أنا ما أقولْ اللِّي صَار فِيني ما هقيته يصير
لأنِّي كِنتْ (مِتأكِـدْ) بأنْ البُعـد ينهـيني
الخميس أكتوبر 18, 2007 3:16 am
